Esti añu ríndese un homenaxe a Conceyu Bable, l'asociación que dio orixe al actual procesu de recuperación de la llingua asturiana
03 may 2024 . Actualizado a las 10:04 h.Esti vienres 3 de mayu celebra'l Día de -yos Lletres Asturianes con un descuentu del 10% al mercar discos o llibros n'asturianu o gallego-asturianu y de regalu'l llibru 'Conceyu Bable. El frutu y la semiente', un homenaxe en formatu papel a l'asociación que dio orixe al actual procesu de recuperación de la llingua asturiana.
Esti llibru, editáu especialmente pa esta celebración, ta escritu por 12 persones dende perspectives estremaes y nél cuenten dende los aspectos xenerales, el contestu históricu en 1974 cuando se crea Conceyu Bable, hasta les cuestiones más particulares como les impresionaes d'un mozu militante d'aquella dómina. Entre tanto, esti exemplar recueye cómo yera la vida política nesi momentu, la sociedá, l'asturianismu, el periodismu, la música y l'aportación de les muyeres al colectivu yá mentáu.
Per otra llau, tamién se publica otru volume, nesti casu en gallego-asturianu, que va regalase en delles llibreríes: 'Dedín, dedín...', de Belén Rico Prieto.
DEFENSA COLECTIVA DE LA LENGUA ASTURIANA
Al dedicar la Selmana de les Lletres de 2024 a Conceyu Bable, el propósitu ye facer historia y reivindicar un legáu que tovía se percibe cercanu, a pesar de los años trescurríos. El protagonismu d'esa Selmana va ser colectivu, como lo foi'l movimientu que dio orixe a l'asociación del mesmu nome.
La revista Asturias Semanal publicaba en xunu de 1974 una entrevista a trés mozos universitarios: Xuan Xosé Sánchez Vicente, Xosé Lluís García Arias y Lluís Xabel Álvarez, que facíen una llamada d'atención a la sociedá contra'l complexu d'inferioridá rexonal y defendíen la llingua asturiana como un bien cultural, asina como la so presencia nos medios de comunicación y na escuela, y la creación d'una lliteratura y d'un públicu pa ella.
En payares de 1974 la mesma revista entamaba una sección baxo'l nome Conceyu Bable, de la que se responsabilizaba'l Grupu CB, primero quincenal y ensiguida selmanal, que se mantuvo hasta'l pieslle de la revista, en xunu de 1977. Neses páxines ta l'empiezu d'un llabor de dinamización social que foi más allá de la reivindicación llingüística, sirviendo como puntu d'inflexón al empiezu de la Transición.
L'autonomía y los símbolos que la identifiquen, como la bandera o l'himnu, les distintes facetes de la música asturiana: la gaita, l'asturianada, la canción d'autor, el deporte tradicional, el quesu o la sidra tuvieron na xente de Conceyu Bable los grandes impulsores; pero la so principal contribución foi llograr que se diera un pasu novedosu alredor de la llingua asturiana: de ser un atributu identitariu o un elementu patrimonial a conformar un valor absolutu capaz a xenerar una nueva identidá social. La campaña Bable nes escueles que promovió llevó esi lema hasta los últimos rincones d'Asturies.