Avilés celebra los 50 años de Conceyu Bable cola preestrena del documental «Atiendi, Asturies, atiendi»

En plena celebración de la 45 Selmana de les Lletres Asturianes, qu'esti añu ta dedicada a l'asociación Conceyu Bable, el conceyu d'Avilés programó la preestrena del documental «Atiendi, Asturies, atiendi», una obra documental qu'afonda nel papel del colectivu p'afitar la identidá y cultura d'Asturies dende los sos oríxenes y percorriendo la so trayectoria.

Nel actu, nel que tuvo presente'l so director, Inaciu Galán, proyectóse la pieza, d'una hora y diez minutos de duración y na qu'apaecen figures imprescindibles na hestoria de la organización, como Xose Lluis García Arias, Xuan Xosé Sánchez Vicente o Lluis Xabel Álvarez, pero tamién militantes de base na organización y que contribuyeron al desenvolvimientu correctu de la xera pola qu'entamaron el so activismu.

Tres la proyección, Miguel Solís Santos, fundador de Conceyu Bable Avilés, dio una charra na que fixo un repás cronolóxicu a los llabores de l'asociación y, sobre manera, la relevancia que tuvo nel conceyu avilesín. El director, Inaciu Galán, destacó que «Avilés foi el primer conceyu nel que se descolingó la bandera d'Asturies na casa conceyu, porque foi un conceyu con un movimientu mui intensu». Un datu al que Miguel Solís Santos añedió que foi «el 22 d'abril de 1977 y cumplíase'l tercer centenariu del nuevu Conceyu d'Avilés y tres dir na Pascua del 76 tres de les carroces, armando la de Dios».

Magar d'esi movimientu intensu al que se refería Galán, Solís remarcó que «yéremos cinco y autofinanciábamosnos cola venta de pegadielles y dando cursos d'asturianu». Fixó tamién la nacencia del colectivu n'Avilés n'agostu de 1975, cuando atroparon cuatro mil firmes de sofitu a la reconocencia del asturianu. Anguaño, 50 años depués, la so hestoria ye parte de la identidá d'Asturies.

---

---

---