L'Academia de la Llingua Asturiana convoca la segunda prueba de conocencia y el cursu de capacitación n'eonaviegu

L'Academia de la Llingua Asturiana dio anuncia esta mañana de dos convocatories nueves: la segunda prueba de conocencia nel añu 2024 y la prueba d'accesu al cursu de capacitación docente d'eonaviegu. Mientres que la primera ye una prueba pa conocer el nivel d'asturianu de la persona, la segunda ye una prueba que, en casu d'aprobase, va dar accesu al cursu de capacitación pa poder poner clas d'eonaviegu nos sos ámbitos d'influyencia.

Segunda prueba de conocencia 2024

Esta segunda prueba de conocencia de l'ALLA va tener llugar el sábadu 25 de mayu nel Llar de la cai Águila 10, n'Uviéu, con un llamamientu a les 9.50 hores y l'empiezu de la prueba a les 10 hores. Ta prevista una duración total de, aproximao, dos hores. La matrícula ta abierta hasta’l 22 del mesmu mes al traviés d’esti enllaz. La inscripción requier que la persona seya mayor de 16 años o los cumpla nel añu vixente y, nel casu de ser declarada como persona apta, l’Academia dará-yos un certificáu dixital onde s’afite la conocencia nel nivel 1 o básicu según los calces siguíos pola institución.

La prueba va tener dos partes: d'una banda, una parte que consta de cuatro estayes: comprensión escrita, espresión escrita, comprensión oral y usu del asturianu. En total, los aspirantes van enfrentase a ocho actividaes nun tiempu máximu de 90 minutos. D'otra banda, la segunda parte tien namás una estaya: espresión oral. Consta de dos actividaes en 15 minutos y pa esta parte ye necesario que cada persona prepare un tema a esponer el mesmu día del esame nos primeros cinco minutos de la prueba. Esti tema ye de llibre elección. La propia institución pon a disposición del públicu un exemplu d'esta prueba.

Prueba d'accesu al cursu de capacitación docente d'eonaviegu

La prueba d'accesu al cursu de capacitación docente d'eonaviegu va desenvolvese'l 1 de xunu a les 10:30 hores nel IES Marques de Casariego de Tapia pal qu'hai que tar apuntáu nesti enllaz. En casu de ser la persona declarada apta, el candidatu va ser el responsable de comprobar que, nel plazu aproximao d'un mes depués de la prueba, va tar en disposición de demostrar que cumple los requisitos de formación universitaria necesarios pa matriculase nel cursu (Grau en Mastru de Primaria o Grau en titulaciones filolóxiques xunto cola titulación pedagóxica habilitadora). La primer fase del cursu de capacitación, que se va facer nel Complexu Cultural As Quintas d'A Caridá va dar empiezu el 29 de xunetu y va rematar el 9 d'agostu.

---

---