L'asociación califica de «escuses» les esplicaciones del conceyal de Deportes de Xixón y píde-y que rectifique
02 may 2024 . Actualizado a las 18:11 h.Iniciativa pol Asturianu llamenta la persecución al idioma entamada pol Patronatu Deportivu Municipal de Xixón al suprimir la presencia de la llingua asturiana nel programa d’actividaes Préstanos facer deporte. La organización de reivindicación llingüística ve inxustificable la decisión y considera que los argumentos apurríos pol conceyal de Deportes, Jorge Pañeda, por una supuesta confusión ente’l significáu n’asturianu y en castellán del verbu prestar, «nun son más qu’escuses».
La entidá entiende qu’esta decisión incumple la ordenanza municipal d’usu del asturianu y contravién l’espíritu del Plan de Normalización del Conceyu pal periodu 2024-2027 aprobáu por unanimidá nel Conseyu Asesor de la Llingua Asturiana de Xixón y que va ser ratificáu bien llueu en Plenu.
La organización de reivindicación llingüística invita al grupu municipal popular a reflexonar sobre esti pasu atrás na presencia normal del asturianu nesta campaña: «Nun ye de recibu presumir tolos díes de l’aprobación de la Llei d’Usu y, al mesmu tiempu, xenerar estos conflictos onde l’idioma sal perdiendo. Instamos al edil de Deportes a la recuperación del asturianu nesti programa d’actividaes que llevaba varios años vixente ensin xenerar nengún tipu de conflictu nin confusión como argumenta la conceyalía».
L’asociación estima qu’esti cambéu —del asturianu al castellán-— ye especialmente grave al tratase d’una campaña orientada a la mocedá. La presencia habitual, con normalidá y en diferentes campañes informatives, especialmente orientaes al públicu xoven, ye fundamental pa normalizar, visibilizar, recuperar falantes y garantizar la tresmisión xeneracional del idioma.
Iniciativa pol Asturianu ye una asociación ensin porgüeyu económicu que nun recibe ayudes nin sovenciones públiques, que lleva más d’una década trabayando pola normalización social de les llingües asturianes y pol reconocimientu de los drechos llingüísticos de los sos falantes.